Heb 7 | BOJ | STEP | Melkisedek a Salem qure naŋgo mandor koba soqnej. A Tamo Koba Qotei aqa atra tamo soqnej. Abraham a mandor kokba qudei naŋgi ti qotsiqa naŋgi ñumsiqa olo aqa qureq beqnaqa bati deqa Melkisedek a gamq di Abraham turosiqa aqa gateq di baŋ atetosiqa a qa pailyej.

Hebrews 7

Melkisedek a ñam tulaŋ koba ti soqnej

1 Melkisedek a Salem qure naŋgo mandor koba soqnej. A Tamo Koba Qotei aqa atra tamo soqnej. Abraham a mandor kokba qudei naŋgi ti qotsiqa naŋgi ñumsiqa olo aqa qureq beqnaqa bati deqa Melkisedek a gamq di Abraham turosiqa aqa gateq di baŋ atetosiqa a qa pailyej. 2 Onaqa iŋgi iŋgi kalil Abraham a mandor kokba naŋgoq dena eleŋej qaji di a na poto 10-pelatosiq oto qujai Melkisedek atraiyej. Melkisedek aqa ñam di aqa damu agiende, Kumbra Tiŋtiŋ Yeqnu Qaji Mandor. Ariya a Salem qure naŋgo mandor soqnej deqa qure ñam Salem aqa damu agiende, Are Lawo Qaji Mandor. 3 Melkisedek a abu saiqoji. A ai saiqoji. A leŋ bei saiqoji dego. Aqa ŋambabo bati di iga qaliesai. Aqa moiqajqa bati di dego iga qaliesai. Deqa a Qotei aqa Ŋiri bul. Deqa a bati gaigai atra tamo sqas.

4 Melkisedek aqa ñam tulaŋ kobaquja. Niŋgi deqa are qaliye. Gago moma utru Abraham a iŋgi bole bole mandor kokba naŋgoq dena eleŋosiqa poto 10-pelatosiq oto qujai Melkisedek atraiyej. 5 Ariya niŋgi quiye. Livai aqa leŋ naŋgi atra tamo sosib waueqnub. Dal anjam a marej, Israel naŋgi na naŋgo silali ti iŋgi iŋgi ti poto 10-pelatoqnsib oto qujai Livai aqa leŋ naŋgi enjroqnqab. Bole, Israel ti Livai ti naŋgi koba na leŋ qujai. Naŋgi kalil Abraham aqa leŋ. Ariya Israel naŋgi na naŋgo iŋgi iŋgi poto 10-pelatoqnsib oto qujai Livai naŋgi enjreqnub. 6 Melkisedek a Livai naŋgo leŋ sai. Ariya Abraham a na iŋgi bole bole di poto 10-pelatosiq oto qujai Melkisedek atraiyej. Onaqa Melkisedek a Abraham aqa gateq di baŋ atetosiqa a qa pailyej. Abraham agi nami Qotei na minjej, “Ino leŋ naŋgi tulaŋ gargekobaqab.” 7 Iga qalie, tamo ñam ti unub qaji naŋgi na tamo ñam saiqoji unub qaji naŋgo gateq di baŋ atetnjroqnsib naŋgi qa pailyeqnub.

8 Israel naŋgi na Livai naŋgi iŋgi iŋgi atrainjreqnub. Livai naŋgi dego mandam tamo. Deqa naŋgi moreŋeqnub. Ariya Melkisedek agi Abraham na iŋgi bole bole atraiyej qaji a moiosai. A bati gaigai soqnej. Agi naŋgi aqa moiqajqa bati nami neŋgreŋyosaioqneb. 9 Livai naŋgo moma utru agi Livai qujai. Deqa iga endegsi marqom, Livai a segi na iŋgi iŋgi osiq Melkisedek atraiyej. 10 Bole, Melkisedek na Abraham gamq di turej bati di Livai a ŋambabosaisoqnej. Ariya Abraham na iŋgi iŋgi Melkisedek atraiyej bati deqa Livai a Abraham aqa jejamu miligiq di soqnej.

Atra tamo bunuj Yesus a na Livai naŋgi tulaŋ buŋnjrejunu

11 Nami Israel tamo uŋgasari naŋgi dal anjam eb. Dal anjam di a marej, Livai naŋgi atra tamo sqab. Ariya Livai naŋgi atra tamo sosib wauoqneb wau dena tamo uŋgasari naŋgi boletnjro-saioqnej. Naŋgi boletnjrej qamu Qotei a kiyaqa olo atra tamo bei brantqa marej? Od, Qotei a olo marnaqa tamo bei brantosiq a gago atra tamo unu. Aron a atra tamo soqnej dego sai. Melkisedek a atra tamo soqnej dego kere tamo bei a brantosiq a gago atra tamo unu. 12 O was qu, dal anjam a marej, Livai naŋgi atra tamo sqab. Ariya bunuqna Qotei a Livai naŋgi kobotnjrsiqa olo atra tamo bei atej. Aqa kumbra dena a na dal anjam dego bulyosiq olo dal anjam bei atej. 13 Atra tamo Qotei na atej qaji di agi Yesus. A Livai aqa leŋ naŋgoq dena ŋambabosai. A Juda aqa leŋ naŋgoq dena ŋambabej. Juda aqa leŋ naŋgi nami atraiyqajqa wau ojosaioqneb. 14 Iga qalieonum, gago Tamo Koba Yesus a Juda aqa leŋ naŋgoq dena ŋambabej. Ariya Juda aqa leŋ naŋgoq dena atra tamo naŋgi brantqajqa Moses a deqa marosaioqnej.

15 Melkisedek a atra tamo soqnej dego kere atra tamo bunuj a brantonaq iga unem. Deqa iga poigwo, atra tamo bunuj dena Livai naŋgi tulaŋ buŋnjrejunu. 16 Dal anjam a marej, atra tamo naŋgi Livai aqa leŋ naŋgoq dena brantqab. Ariya Yesus a gaigai ŋambile ti siŋgila ti sqas gam dena a atra tamo brantej. 17 Agi Qotei na nami Kristus endegsi minjej,

“Melkisedek a nami atra tamo soqnej
dego kere ni bati gaigai atra tamo sqam.”
18 O was qu, anjam dena iga poigwo, dal anjam nami soqnej qaji di siŋgila saiqoji. Dal anjam dena iga aqaryaigwa keresai. Deqa Qotei na dal anjam di taqal atej. 19 Dal anjam dena iga boletgosai deqa Qotei na dal anjam di taqal atsiqa olo gam bunuj waqtetgej. Gam bunuj di tulaŋ boledamu. Gam dena dal anjam namij di tulaŋ buŋyejunu. Deqa iga gam dena Qotei aqa areq giloqnqom.

20 Qotei na Yesus atra tamo atqa marej. Osiqa aqa anjam di olo siŋgilatej. Ariya atra tamo nami soqneb qaji naŋgi Qotei na atqa maroqnsiq aqa anjam di olo siŋgilatosaioqnej. 21 Ariya Qotei na Yesus atra tamo atqa marsiq aqa anjam di olo siŋgilatonaqa Yesus a atra tamo brantej. Agi Qotei aqa anjam bei nami endegsib neŋgreŋyeb unu,

“Tamo Koba Qotei a na nami Kristus endegsi minjej,
‘Ni bati gaigai atra tamo sqam.’
Osiqa aqa anjam di olo siŋgilatej. Deqa aqa anjam di a olo bunuqna uratqa keresai.”
22 Deqa iga qalieonum, Qotei aqa anjam bunuj Yesus na siŋgilatej qaji di tulaŋ bolequja. Anjam dena dal anjam namij tulaŋ buŋyejunu.

23 Nami tamo gargekoba naŋgi atra tamo soqneb. Di kiyaqa? Naŋgi olo moreŋoqneb. Naŋgi bati gaigai atra tamo sqa keresai. 24 Ariya Yesus a gaigai sqas. A bati gaigai atra tamo sosim wauoqnqas. Tamo bei na aqa sawa oqa keresai. 25 Deqa tamo uŋgasari Yesus aqa ñam na Qotei aqa areq gileqnub qaji naŋgi di a na torei oqa kere. Di kiyaqa? A bati gaigai ŋambile sosim naŋgi qa Qotei pailyoqnqas.

26 Yesus a atra tamo kobaquja dego deqa a na iga tulaŋ aqaryaigwa kere. A gaigai Qotei aqa segi kumbra boleq di sosiq dauryeqnu. A une bei saiqoji. A Qotei aqa ŋamgalaq di tamo tulaŋ boledamu. Qotei na a osi oqsiq laŋ qureq di awotej unu deqa a une tamo naŋgo ambleq di sosai. A isaq di unu. 27 Atra tamo kokba nami soqneb qaji naŋgi bati gaigai wagme iŋgi iŋgi oqnsib Qotei atraiyoqneb. Namoqna naŋgi naŋgo segi une qa wagme iŋgi iŋgi atraiyoqneb. Osib tamo uŋgasari naŋgo une qa dego atraiyoqneb. Ariya Yesus a wau degyosai. A bati qujai qa aqa segi jejamu ŋambile sonaq osiqa Qotei atraiyej. 28 Dal anjam a nami endegsi marej, “Tamo siŋgila saiqoji unub qaji naŋgi atra tamo kokba sqab.” Ariya bunuqna Qotei na olo anjam bei atsiqa aqa segi Ŋiri Yesus osiqa atra tamo kobaquja atej. Deqa Yesus a bati gaigai atra tamo kobaquja sqas.